Buto't balat, Lumilipad

Mataas, matayog na mga pangarap

Na hinihila lamang ng manipis na sinulid

Ipinaglalaban sa hangin

Marupok, madaling masirang mga pat-pat

Na umaakay sa nanghihinang plastik

Pilit tinitibayan ang sarili

Ang hangad, ang panalangin

Na habang buhay na sasambitin ng saranggola kong pag-ibig

Huwag sanang palayain

Sa pagkakatali, sa pagkakakulong sa iyong mga kamay

Na tanging nalalabing makakapitan

Upang makalipad, upang lumigaya, upang mag-mahal

Ngunit napagod, na-pagal

Sa pag-tawag ay lumingon, at bumitiw

Hindi na muli pang tumingala sa langit

Hinayaan, pinalaya ang mga pangako

Na sa hangin ay magpadala ng lubos

Papalayo sa'yo

Hanggang sa anurin, hanggang sa lunurin

Nagugutom na lamunin ng mga ulap

At saka idinura

Pabalik pababa sa lupang susubukan siyang uurin

Ipabubugbog sa mga paang sa kanya'y tatapak

Mapupunit at masisira

Naghihinagpis, nag-uumiyak na humihiling

Na may makaramdam, naka-paa

Pulutin, hilumin, paliparing muli